miðvikudagur, nóvember 29, 2006

Kæru lesendur.

Kærar þakkir fyrir að láta svo lítið að líta við á bloggsíðu véfréttarinnar.

Til að spara ykkur tíma og fyrirhöfn langar mig að beina þeim tilmælum til ykkar að líta næst við miðvikudaginn 13. desember.

Ef ske kynni að ykkur myndi leiðast þangað til get ég bent ykkur á eftirfarandi tengla:

Fyrir ljóðelska:

www.ljóð.is

og fyrir ljóð- og söngelska:

www.vfemmes.com

þriðjudagur, nóvember 21, 2006

Í gær fór Véfréttin í hádegismat með Sveimhuganum á ónefndum heilsu-/uppamatsölustað í borginni. Sveimhuginn þurfti snarlega að mæta til vinnu og véfréttin sat ein eftir með salathrúgu og grænmetishyrnu á disk.

En véfréttinni leiddist ekki. Á sama borði sátu nefnilega tvær ungar snótir, öðrum hvorum megin við tvítugt. Án þess að ætla sér að hnýsast komst véfréttin ekki hjá því að sogast inn í æsispennandi umræður þeirra sem snérust einkum um upplýsingar sem þær höfðu fengið af bloggsíðum vina og kunningja, um leið og þær höfðu skýrar hugmyndir um hvað væri leyfilegt að blogga um og hvað ekki.

Note to self: Ekki blogga um fyrsta skemmtistaða-sleikinn sinn.

Véfréttinni til skelfingar var mest fjallað um ónafngreinda konu sem ljóslega var þvílíkt flagð og fláræðiskvendi að hreint hlaut að teljast með ólíkindum að hún gengi laus. Báru bloggfærslur hennar ódýru innrætinu glögglega merki og þar kom víst einnig fram að hún hefði orðið ólétt tveimur mánuðum eftir að hún kynntist barnsföður sínum (sem er semsagt hneisa). Málin tóku þó að skýrast þegar í ljós kom að umræddur barnsfaðir var einmitt fyrrverandi unnusti annars sessunauts míns og hafði víst ekki hagað sér eins og fyrrverendum sæmir eftir sambandsslitin.

Nema hvað, svo uppnumin var véfréttin af samræðunum að hún varð þess ekki vör að lítill salatdressingarlækur fann sér farveg út af disknum hennar, niður á borðið og þaðan niður á lærið á ljósgráu buxunum hennar, hvaðan hann seitlaði áfram niður innanlæris. Nú kunna lesendur að velta því fyrir sér hvort véfréttin sé tilfinningalaus á lærunum, en hafa ber í huga að sökum vetrarhörku var Véfréttin vandlega bólstruð í hnausþykkar gammósíur sem töfðu töluvert fyrir leið salatsósunnar inn að skinni.

Eftir hádegið átti véfréttin að standa fyrir framan 40 manna áheyrendahóp og kynna verkefni, sem er strax minna fýsilegt þegar kona er komin með salatdressingu á lærin.

Því datt véfréttinni í hug þessi blús:

Salatsósa í klofið
Salatsósa í klofið
(og svo upp um eina tóntegund:)
Salatsósa í klofið
(og aftur niður:)
Salatsósa í klofið

(Af öllum lesendum Véfréttarbloggsins er Skoffínið sennilega hæfasti einstaklingurinn til að útsetja þetta nánar. Óska eftir hljóðfæl).

þriðjudagur, nóvember 14, 2006

Nú gerist Véfréttin tenglaglöð, enda ekki tími til að standa í viðamiklum bloggfærslum um þessar mundir.

Í fyrsta lagi; fyrir ykkur sem sjáið eitthvað athugavert við hómófóbíu stjórnvalda á nágrannaeyjunni:

Skrifa undir hér




Og fyrir ykkur sem hafið gaman að hvert öðru og sjálfum ykkur, þá hvetur Véfréttin til samstilltra aðgerða daginn fyrir Þorláksmessu:

Alheimsfullnæging

föstudagur, nóvember 10, 2006

Sumir kynnu að mistaka eftirfarandi pælingar fyrir aulahúmor, en véfréttinni er ekki skemmt:

Ufsalýsi er búið til úr ufsum (eða olíunni úr þeim eða lifrinni í þeim eða eitthvað þannig).

Þorskalýsi er búið til úr þorskum (með sömu formerkjum).

Hákarlalýsi er búið til úr hákörlum.

Og svo mætti lengi telja.

Í ljósi þessara upplýsinga, finnst þá engum nema véfréttinni neitt athugavert við vöruheitið krakkalýsi?

Og svo er það annað, öllu huggulegra málefni:

Björgum jólunum!

þriðjudagur, nóvember 07, 2006

Margir bloggarar hafa stundum orð á því að þeir séu lélegir bloggarar, þá aðallega vegna tímaskorts eða andleysis. Einhvern tímann hefur véfréttin gert eitthvað svoleiðis líka.

En í dag ætlar véfréttin að setja fram nokkrar skemmtilegar fullyrðingar um sjálfa sig. Veljið endilega þá fullyrðingu sem ykkur finnst eiga best við, eða búið til ykkar eigin (sjá lið 10).

1. Véfréttin er rock-on bloggari.
2. Blogg véfréttarinnar er sóun á plássi í netveröldinni.
3. Véfréttin bloggar ekki nógu oft
4. Véfréttin bloogar allt of oft
5. Véfréttin er ekki nógu andrík
6. Véfréttin er allt of andrík
7. Ef Véfréttin bloggaði daglega væru hvorki hungur né styrjaldir í heiminum.
8. Véfréttinni hefur farið aftur í blogglistinni
9. Véfréttinni hefur farið fram í blogglistinni
10. ___________________________________________